Thursday, 2 October 2014

அரஃபா நோன்பு!




ரமலான் மாதத்தின் கடமையான நோன்புகளைத் தவிர, வருடத்தின் மற்ற சில நாட்களில் நோன்பு வைப்பதும் இஸ்லாத்தில் வரவேற்கத்தக்க, வலியுறுத்தப்பட்ட வணக்கங்களாக உள்ளன. அவற்றில் மிக முக்கியமான நோன்புதான் 'அரஃபா நோன்பு' என்று சொல்லக்கூடிய நோன்பாகும்.



இந்த நோன்பை, இஸ்லாமிய மாதங்களில் இறுதி மாதமான துல்ஹஜ் மாதம் பிறை 9 அன்று நோற்கும்படி நபி(ஸல்) அவர்கள் நம‌க்கு ஆர்வமூட்டியுள்ளார்கள்.

அபூ கதாதா(ரலி) அவர்கள் அறிவிக்கிறார்கள்,
துல்ஹஜ் ஒன்பதாவது நாள் அன்று நோன்பு நோற்பதை, அதற்கு முந்தைய ஓராண்டிற்கும் அதற்குப் பிந்தைய ஓராண்டிற்கும் பாவப் பரிகாரமாக அல்லாஹ் ஆக்குவான் என்று நான் எதிர்பார்க்கிறேன் என்று நபி(ஸல்) அவர்கள் கூறினார்கள்.
                   நூல்:முஸ்லிம்(2151)

இந்த அரஃபா நோன்பை, அவ்வருடம் யார் ஹஜ்ஜுக்கு செல்லாமல் இருக்கிறார்களோ அவர்கள் மட்டும்தான் நோற்கவேண்டும். ஏனெனில் அரஃபா தினத்தன்று அரஃபாவில் ஒன்று கூடியிருக்கும் ஹாஜிகள் நோன்பு நோற்பதற்கு நபி(ஸல்) அவர்கள் தடைவிதித்துள்ளார்கள்.

அரஃபா பெருவெளியில் தங்கியிருப்போர் அரஃபா நாளில் நோன்பு நோற்பதை நபிகள் நாயகம்(ஸல்) அவர்கள் தடை செய்தார்கள் என்று அபூஹுரைரா(ரலி) அறிவிக்கிறார்கள்.              
                     நூல்: இப்னுமாஜா(1722)

'அரஃபா நோன்பு' - பிறை ஒன்பதிலா? அல்லது அரஃபாவில் ஹாஜிகள் கூடிய அன்றா?

Sunday, 21 September 2014

சூதாட்டம்!

 

சூதாட்டம் (Gambling) என்பது, பணம் அல்லது வேறு பெறுமதியான பொருட்களைப் பணயமாக வைத்து ஆடுகின்ற, நிச்சயமற்ற விளைவைக் கொடுக்கக்கூடிய ஒரு விளையாட்டு வகை ஆகும். இதன் அடிப்படை நோக்கம் பணயமாக வைக்கப்பட்ட பணம் அல்லது பொருளிலும் கூடிய பெறுமதியான பணத்தையோ, பொருளையோ அடைவதாகும். பொதுவாக இதன் பெறுபேற்றைக் குறுகிய காலத்துக்குள் அறியக்கூடியதாக இருக்கும். சில நாடுகளில் சூதாட்டம் சட்டத்தால் தடை செய்யப்பட்டுள்ளது. வேறு சில நாடுகள் இதனைக் கட்டுப்பாட்டுடன் அனுமதிக்கின்றன.

பல சமூகங்களில் சூது ஒரு தீய பழக்கமாகவும், விலக்கி வைக்கவேண்டிய ஒன்றாகவும் கொள்ளப்படுகின்றது. கத்தோலிக்க, யூத மரபுகளில் சூதாட்டத்துக்காக குறிப்பிட்ட நாட்களை ஒதுக்கும் வழக்கம் இருந்தது. ஆனால் அவர்களுடைய மதங்கள் சூதாட்டத்தை ஏற்றுக்கொள்வதில்லை. சூதாட்டத்தினால் விரும்பத்தகாத பல சமூக விளைவுகள் ஏற்படுகின்றன. இதனாலேயே பல நாடுகள் சூதாட்டத்தைக் கட்டுப்படுத்துகின்றன. சில இஸ்லாமிய நாடுகளும், வேறு சில நாடுகளும் சூதாட்டத்துக்கு முற்றாகவே தடை விதித்துள்ளன.

இந்து சமய நூல்களும், தமிழில் தோன்றிய நீதி நூல்கள் பலவும் சூதாட்டத்தில் ஈடுபடாடாதிருக்கும்படி அறிவுறுத்துகின்றன. இந்தியாவின் பழைய நூல்களான மகாபாரதக் கதையும், நளன் கதையும் சூதினால் விளைந்த கேட்டையே அடிப்படையாகக் கொண்டு அமைந்தவை.

மனிதர்களே! பூமியிலுள்ள பொருட்களில், அனுமதிக்கப் பட்டவற்றையும், பரிசுத்த மானவற்றையும் உண்ணுங்கள்; ஷைத்தானின் அடிச்சுவடுகளை பின்பற்றாதீர்கள் நிச்சயமாக அவன் உங்களுக்கு பகிரங்கமான பகைவனாவான். 
(அல்குர்ஆன் 2:168)

பழி சுமத்தும் இழி செயல்!

 Post image for பழி சுமத்தும் இழி செயல்

மனித சமுதயாத்தினர் சிலர் எதையும் தீர்க்க அறிய முடியாதவர்கள் அரைகுறைத் தகவல்களை வைத்துக் கொண்டு வெகு விரைவாக எவர் மீதாவது பழி சுமத்திவிடுகின்றனர். பழி சுமத்துவதற்கு பல காரணங்கள் இருந்தாலும் ஆதிக்க உணர்வும் காரணமாகி விடுகின்றது. சிலர் சிலர்மீது ஆதிக்கம் செலுத்துகின்றனர். இந்த ஆதிக்கம் பலனளிக்காமல் போனால் இதுவே பழி சுமத்துவதற்கு காரணமாகி விடுகின்றது.

ஆதிக்கம் செலுத்துபவர்கள் அன்பு காட்டி பார்க்கின்றனர். அதற்கு அடிபணிய வில்லையானால் ஆசை காட்டி பார்க்கின்றனர். அதற்கும் மசியவில்லையானால் குற்றம் குறை ஏதும் இருக்கின்றதா? என்று பார்க்கின்றனர். இருந்து விட்டால் அதற்கு கண், காது, மூக்கு எல்லாம் வைத்து அரட்டி மிரட்டி அடி பணிய வைக்கின்றர். இதிலும் தோல்வி அடைந்துவிட்டால் பழி சுமத்தும் இழி செயலில் ஈடுபட்டு அடக்க முயல்கின்றனர்.
இது குறித்து அல்லாஹ் தன் திருமறையில்...

மூஃமினான ஆண்களையும், மூஃமினான பெண்களையும் செய்யாததை (செய்ததாக) கூறி எவர்கள் நோவினை செய்கிறார்களோ அவர்கள் நிச்சயமாக அவதூறையும் வெளிப்படையான பாவத்தையுமே சுமந்து கொள்கிறார்கள்.
  (அல்குர்ஆன் 33:58)

Sunday, 14 September 2014

இறப்புச்செய்தி!

அரபித்தெரு அன்சாரி – மன்சூர் சகோதரர்களின் தாயார் ஷம்சுல்ஹுதா அவர்கள் நேற்று இரவு (13.09.2014) இறந்துவிட்டார்கள்.

இன்னா லில்லாஹி வ இன்னா இலைஹி ராஜிஹூன்.

அன்னாரின் மண்ணறை வாழ்வும், மறுமை வாழ்வும் சிறப்புள்ளதாகவும், வெற்றியுள்ளதாகவும் அமைய எல்லாம் வல்ல அல்லாஹ் கிருபை செய்வானாக!

.

Sunday, 7 September 2014

எழுந்து நின்று மரியாதை செய்தல் பற்றி இஸ்லாம்!!!


 

வயதில் பெரியவர், ஆசிரியர், தலைவர்கள், முதலாளிகள், நிர்வாகிகள், மேலதிகாரிகள் போன்றோருக்காக மற்றவர்கள் எழுந்து நின்று மரியாதை செய்வதை உலகமெங்கும் காண்கிறோம்.

மேல் நிலையில் உள்ளவர்கள் இந்த மரியாதையை உளமாற விரும்புவதையும் நாம் காண்கிறோம். ஆனால் இஸ்லாத்தில் இதற்கு அனுமதி இல்லை.

எந்த மனிதரும் எந்த மனிதருக்காகவும் மரியாதை செய்யும் விதமாக எழுந்து நிற்கக் கூடாது என்று நபிகள் நாயகம் கட்டளை பிறப்பித்தார்கள்.

நபிகள் நாயகத்துக்குப் பின் முஸ்லிம் சாம்ராஜ்யத்தின் ஐந்தாவது அதிபராகத் திகழ்ந்தவர் முஆவியா (ரலி). அவர் வெளியே வந்த போது அவரைக் கண்ட அப்துல்லாஹ் பின் ஸுபைர் அவர்களும், இப்னு சஃப்வான் அவர்களும் எழுந்து நின்றனர். உடனே முஆவியா (ரலி) அவர்கள் ‘அமருங்கள்’ என்றனர். ‘தனக்காக மக்கள் எழுந்து நிற்க வேண்டும் என்று யார் விரும்புகிறாரோ அவர் தனது தங்குமிடத்தை நரகத்தில் ஏற்படுத்திக் கொள்கிறார்’ என்று நபிகள் நாயகம் (ஸல்) கூறியதை நான் செவியுற்றுள்ளேன். என்றும் முஆவியா (ரலி) கூறினார்கள்.
 நூல்கள்: திர்மிதீ 2769 அபூதாவூத் 4552

மன்னருக்காகக் கூட மக்கள் எழக் கூடாது. அவ்வாறு எழ வேண்டும் என்று எந்த முஸ்லிமும் எதிர்பார்க்கக் கூடாது என்பதை நபிகள் நாயகம் (ஸல்) அவர்கள் தெளிவாக அறிவித்துச் சென்றதை இந்த வரலாற்றிருந்து நாம் அறிகிறோம்.

Tuesday, 26 August 2014

நல்லதை ஏவுவோம் தீயதை தடுப்போம்!

 
மனிதன் ஒன்று முதல் ஐயறிவுகளைப் பெற்றுள்ள இடத்தினின்றும் முற்றிலும் மாறுபட்டவனாக விளங்குகின்றான். எதனையும் பகுத்துணரும் பக்குவத்தைப் பெற்றவனாகவும் திகழ்கிறான். எது உன்மையான செயல், எது தீமையான செயல் என்பதில் அவனுக்குப் படிப்படியாக தெளிவும் ஏற்பட்டு விடுகின்றது.

சிந்தனைப் தெளிவும் சீர் தூக்கிப் பார்க்கும் மன நிலையும் ஏற்பட்டு விட்ட வளர்ந்த மனிதன் பகுத்தறிவினால் வாழ முற்படுகிறான். இந்நிலையில் காலங்காலமாக பரம்பரை பரம்பரையாக நடைமுறைப்படுத்தப்பட்ட பகுத்தறிவுக்கொவ்வாத சில சடங்குகள் சம்பிரதாயங்களையும் விட்டுவிட மனத் துணிவில்லாமல் அவன் தத்தளிக்கவும் செய்கிறான்.

இந்நிலையில் இறை நம்பிக்கை கொண்டுள்ள முஸ்லிம்களாகிய நாம் எங்கனம் செயல்பட வேண்டும் என்பதை அல்குர்ஆன் நமக்கு அரிய வழிகாட்டியாகத் திகழ்கின்றது.

மேலும் நன்மையின் பக்கம் அழைப்பவர்களாகவும், நல்லதை கொண்டு ஏவுபவர்களாகவும் தீயதிலிருந்து விலக்குபவர்களாகவும் உங்களிலிருந்து ஒரு கூட்டத்தார் இருக்கட்டும், இன்னும் அவர்களே வெற்றி பெற்றோராவர்.
 (அல்குர்ஆன் 3:104)

மனிதர்களுக்காக தோற்றுவிக்கப்பட்ட சிறந்த சமுதாயமாக நீங்கள் இருக்கிறீர்கள்; (எனெனில்) நீங்கள் நல்லதைச் செய்ய ஏவுகிறீர்கள்; தீயதை விட்டும் விலக்குகிறீர்கள்; இன்னும் அல்லாஹ்வின் மேல் நம்பிக்கை கொள்கிறீர்கள்; வேதத்தையுடையோரும் நம்பிக்கை கொண்டிருப்பின் (அது) அவர்களுக்கு நன்மையாகும் – அவர்களில் (சிலர்) நம்பிக்கை கொண்டோராயும் இருக்கின்றனர்; எனினும் அவர்களில் பலர் பாவிகளாகவே இருக்கின்றனர். 
(அல்குர்ஆன் 3:110)

Wednesday, 20 August 2014

இறப்புச்செய்தி!

அஸ்ஸலாமு அலைக்கும் வரஹ்மத்துல்லாஹி வ பரகாத்துஹு! 

ரைஸ்மில் தெரு கிபாயத்துல்லாஹ், முஹம்மது அலி மற்றும் சித்திக் சகோதரர்களின் தாயார் ஹாத்தூன் பீவி அவர்கள் இன்று (20.08.2014) இறந்துவிட்டார்கள்.

இன்னா லில்லாஹி வ இன்னா இலைஹி ராஜிஹூன்.

அன்னாரின் மண்ணறை வாழ்வும், மறுமை வாழ்வும் சிறப்புள்ளதாகவும், வெற்றியுள்ளதாகவும் அமைய எல்லாம் வல்ல அல்லாஹ் கிருபை செய்வானாக!
.

Sunday, 10 August 2014

இறப்புச்செய்தி!

ரயிலடிதெரு மர்ஹும் TA ஷேக் தாவூது அவர்களின் மகனும் ஆசிக் அலி இஸ்மத் அலி சகோதரர்களின் தந்தையுமாகிய TAS சித்திக் அவர்கள் இன்று (10.08.2014) இறந்து விட்டார்கள். 

இன்னா லில்லாஹி வ இன்னா இலைஹி ராஜிஹூன்.

அன்னாரின் மண்ணறை வாழ்வும், மறுமை வாழ்வும் சிறப்புள்ளதாகவும், வெற்றியுள்ளதாகவும் அமைய எல்லாம் வல்ல அல்லாஹ் கிருபை செய்வானாக!

Sunday, 3 August 2014

இறப்புச்செய்தி!

அஸ்ஸலாமு அலைக்கும் வரஹ்மத்துல்லாஹி வ பரகாத்துஹு! 

பள்ளிவாசல் தெரு மர்ஹூம் SK அஹமது யாஸீன் அவர்களின் மனைவியும் மன்சூர் சகோதரர்களின் தாயாருமாகிய மதீனா பீவி அவர்கள் இன்று (03.08.2014) அஜீஸ் நகர் தமது மகளார் வீட்டில் இறந்துவிட்டார்கள்.

இன்னா லில்லாஹி வ இன்னா இலைஹி ராஜிஹூன்.

அன்னாரின் மண்ணறை வாழ்வும், மறுமை வாழ்வும் சிறப்புள்ளதாகவும், வெற்றியுள்ளதாகவும் அமைய எல்லாம் வல்ல அல்லாஹ் கிருபை செய்வானாக!

.

Thursday, 31 July 2014

ஃபித்ரா விநியோகம் - 2014!

அஸ்ஸலாமு அலைக்கும் வரஹ்....




அமீரகத்தில் வசிக்கும் நமதூர் அன்பரகளிடமிருந்தும், அவர்களின் நண்பரகளிடமிருந்தும் ஒன்றுதிரட்டப்பட்ட ஈகைத்தொகையாம் ஃபித்ரா தொகையினை அல்லாஹ்வில் கிருபையால் கடந்த 27.07.2014 ஞாயிற்றுக்கிழமை மதியம் நமதூர் புதுமனைத்தெருவில் வைத்து சிறப்பான முறையில் விநியோகம் செய்யப்பட்டது.  

ஃபித்ரா பொருளாக இவ்வருடம் நபர் ஒன்றுக்கு சுமார் ரூபாப் 895/- மதிப்புள்ள மளிகைப்பொருட்கள் கொடுக்கப்பட்டது. இதற்காகவேண்டி உதவியும் ஒத்துழைப்பும் நல்கிய நல்லுள்ளங்களுக்கு சங்கத்தின் சார்பிலும் அனைவருக்கும் நன்றியினை தெரிவித்துக்கொள்கிறோம் (ஜஸாகல்லாஹ்). மேலும் எல்லாம் வல்ல அல்லாஹ் ஈருலகிலும் மகத்தான கூலியை வழங்குவானாக.  

மொத்த ஃபித்ரா செலவு: ரூபாய் - 1,56,500/-

பயனாளிகள் - சுமார் 200 நபர்கள். 

இன்ஷா அல்லாஹ் நமது துபாய் சங்கத்தின் வாயிலாக இனிவரும் காலங்களிலும் இதுபோன்றும், இதற்கும்மேலாகவும் நமதூருக்கும், நமதூர்வாசிகளுக்கும் உதவிகளையும், ஆக்கப்பூர்வ பணிகளை செய்வதற்கு எல்லாம் வல்ல அல்லாஹ் கிருபை செய்வானாக! 

.

Sunday, 27 July 2014

இன்று ஃபித்ரா விநியோகம்!



அஸ்ஸலாமு அலைக்கும் வரஹ்.... 

இன்ஷா அல்லாஹ் இன்று (27.07.2014) மாலை நமதூரில் நமது துபாய் சங்கத்தின் மூலமாக ஃபித்ரா பொருட்கள் விநியோகிக்கப்பட இருக்கிறது. 

இடம்: சாதிக் இல்லம், புதுமனைத்தெரு, 

நாள்: 27.07.2014

நேரம்: மதியம் 3 மணியளவில்

Saturday, 19 July 2014

லைலத்துல் கத்ர்!


அல்லாஹ் தன்னுடைய திருமறை கூறியதை ஒரு முறை நன்கு படித்துப்பாருங்கள்

إِنَّا أَنزَلْنَاهُ فِي لَيْلَةِ الْقَدْرِ

நிச்சயமாக நாம் அதை (குர்ஆனை) கண்ணியமிக்க (லைலத்துல் கத்ர்) என்ற இரவில் இறக்கினோம்.

وَمَا أَدْرَاكَ مَا لَيْلَةُ الْقَدْرِ

மேலும் கண்ணியமிக்க இரவு என்ன என்பதை உமக்கு அறிவித்தது எது?

لَيْلَةُ الْقَدْرِ خَيْرٌ مِّنْ أَلْفِ شَهْرٍ

கண்ணியமிக்க (அந்த) இரவு ஆயிரம் மாதங்களை விட மிக்க மேலானதாகும்.

تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِم مِّن كُلِّ أَمْرٍ

அதில் மலக்குகளும், ஆன்மாவும் (ஜிப்ரீலும்) தம் இறைவனின் கட்டளையின் படி (நடைபெற வேண்டிய) சகல காரியங்களுடன் இறங்குகின்றனர்.

سَلَامٌ هِيَ حَتَّىٰ مَطْلَعِ الْفَجْرِ


சாந்தி (நிலவியிருக்கும்); அது விடியற்காலை உதயமாகும் வரை இருக்கும்.


(97:1-5)

அல்லாஹ்வின் தூதரே லைலத்துல்கத்ர் இரவை நான் அடைந்துகொண்டால் அதில் நான் என்ன பிரார்த்திப்பது? என்று வினவினேன். அதற்கு நபி அவர்கள் அல்லாஹும்ம இன்னக அஃபுவுன் துஹிப்புல் அஃப்வஃப அஃபுஅன்னீ (பொருள்: இறைவா நீ மன்னிப்பவன் மன்னிப்பையே விரும்புபவன் எனவே என்னுடைய பாவங்களை மன்னித் தருள்வாயாக!) 
அறிவிப்பாளர்: ஆயிஷா (ரலி), நூலகள்்: திர்மிதி, நஸயீ, இப்னுமாஜா, அஹமத்

اَللَّهُمَّ اِنَّكَ عَفُوٌّ ، تُحِبُّ الْعَفْوَ فَاعْفُ عَنِّي


''லைலத்துல் கத்ர்'' இரவும்-இருபத்தி ஏழும்..!



நிச்சயமாக நாம் அதை (குர்ஆனை) கண்ணியம் மிக்க (லைலத்துல் கத்ர்) என்ற இரவில் இறக்கினோம். மேலும் கண்ணியமிக்க இரவு என்ன என்பதை உமக்கு அறிவித்தது எது? கண்ணியமிக்க (அந்த) இரவு ஆயிரம் மாதங்களைவிட மிக மேலானதாகும். அதில் மலக்குகளும், ஆன்மாவும் (ஜிப்ரயீலும்) தம் இறைவனின் கட்டளையின்படி (நடைபெற வேண்டிய) சகலகாரியங்களுடன் இறங்குகின்றனர். சாந்தி (நிலவியிருக்கும்), அது விடியற்காலை உதயமாகும் வரை இருக்கும்.'' 
(அல் குர் ஆன் 97: 1 - 5)

என லைலத்துல் கத்ர் இரவைப்பற்றி அல்லாஹ் அருள்மறை குர்ஆனில் குறிப்பிடுகிறான். இந்த லைலத்துல் கத்ர் இரவு எப்போது, அதில் நம்முடைய வணக்க வழிபாடுகள் எவ்வாறு இருக்க வேண்டும் என்பதை குர்ஆன் - ஹதீஸ் ஒளியில் ஆய்வு செய்வோம்.லைலத்துல் கத்ர் இரவு ரமலான் மாதத்தின் 27ஆம் இரவில்தான் என இஸ்லாத்தில் பெரும்பான்மையான மக்கள் விளங்கி வைத்துள்ளனர். அவர்கள் அவ்வாறு விளங்கிக் கொண்டதற்கு காரணத்தையும் கூறுகின்றனர்.

லைலத்துல் கத்ர் இரவு பற்றி அல்லாஹ் இறக்கிய மேற்படி அத்தியாயத்தில் லைலத்துல் கத்ர் என்ற வார்த்தை மூன்று முறை வருகிறது. மேற்படி மூன்றை ஒன்பதைக் கொண்டு பெருக்கினால் இருபத்திஏழு. எனவே இருபத்தி ஏழாம் இரவில்தான் லைலத்துல் கத்ர் என்று, குர்ஆனிலும், ஹதீஸிலும் இல்லாத ஒரு ''அரிய?..!'' விளக்கத்தைத் தருகின்றனர்.

Monday, 7 July 2014

ஃபித்ரா தொகை நபர் ஒன்றுக்கு திர்ஹம் 20.00 (அமீரகத்தில்)



அஸ்ஸலாமு அலைக்கும் வரஹ்....

அமீரகத்தில் வசிக்கும் நமது சகோதரர்களிடமிருந்து பெறப்படும் "சதக்கத்துல் பித்ர்" எனும் பித்ரா தொகையினை நமதூரில் வசிக்கும் ஏழை எளிய மக்களுக்கு வருடந்தோறும் நாம் விநியோகித்து வருவதனை அனைவரும் நன்கு அறிவோம். 


அதன் தொடர்ச்சியாக இன்ஷா அல்லாஹ் இந்த ஆண்டும் அதுபோன்று விநியோகம் செய்ய இருக்கிறோம். எனவே நமதூர் சகோதரர்கள் அனைவரும் நிர்ணயிக்கப்பட்ட பித்ரா தொகையான திர்ஹம் 20 (இருபது மட்டும்) நமது துபாய் சங்கத்திடம் வழங்கிடுமாறும் நேரில் வர இயலாதவர்கள் தம் அருகில் உள் சகோதரர்களை தொடர்புக்கொண்டு வங்கிடுமாறும் அன்போடு கேட்டுக்கொள்ளப்படுகிறார்கள். நமதூர் சகோதரர்களிடமிருந்து மட்டுமின்றி தம்முடன் வசிக்கும் அல்லது பணிபுரியும் சகோதரர்களிடமிருந்தும் இயன்றவரை பித்ராவினை பெற்றுக்கொள்ளுமாறும் கேட்டுக்கொள்ளப்படுகிறார்கள்.

பித்ரா நபர் ஒன்றுக்கு: திர்ஹம் 20.00

இப்னு உமர் (ரலி) அறிவிக்கின்றார்கள், நபி முஹம்மது (ஸல்) அவர்கள் முஸ்லிம்களான சுதந்திர அடிமையான ஆண்கள், பெண்கள், பெரியவர்கள், சிறியவர்கள் அனைவர்மீதும் திராட்சை, கோதுமை என்பவற்றிலிருந்து ஒரு ஸாஉ அளவை ஸதகதுல் பித்ராவாக விதியாக்கியுள்ளார்கள். (புஹாரி, முஸ்லிம்)

இப்னு அப்பாஸ் (ரலி) அறிவிக்கின்றார்கள் நோன்பாளி அர்த்தமற்ற மோசமான வார்த்தைகளைப் பேசியிருந்தால் அவ்வழுக்குகளிலிருந்து தூய்மை பெறவும், ஏழை எளியவர்களுக்கு (மிஸ்கீன்) உணவு கொடுக்கவும் வசதியாக நபி முஹம்மத் (ஸல்) அவர்கள் ஸதகதுல் பித்ரை விதியாக்கியுள்ளார்கள். தொழுகைக்கு முன்னர் (பெருநாள் தொழுகை) இதனை நிறைவேற்றினால் அது அங்கீகரிக்கப்பட்ட ஸதகதுல் பித்ராவாக அமையும். தொழுகையின் பின்னர் நிறைவேற்றப்படின் அது சாதாரண தர்மம் (ஸதகா) ஒன்றாகவே கருதப்படும் (அபூதாவுத்)

.